Мектеп жасына дейінгі балаларды өрт қауіпсіздігі шараларына үйрету бойынша ұсынымдар

Қазақстан Республикасы Ішкі істер министрлігі (бұдан әрі – Министрлік) халықты төтенше жағдайлар кезінде жүріс-тұрыс қағидаларына оқыту бойынша мақсатты түрде жұмыс жүргізуде. Өскелең ұрпаққа ерекше назар аударылады. Министрлік және оның аумақтық бөліністері Қазақстан Республикасы Білім және ғылым министрлігімен тиісті жоспар шеңберінде бiлiм беру ұйымдарының оқушыларын төтенше жағдайлар кезінде жүріс-тұрыс қағидаларына оқыту бойынша жүйелі түрде маусымдық интерактивті сабақтар жүргізеді.

Алайда, Министрлік жүргізген талдау бүгінгі күні өрт кезінде және улы газбен уланудан балалардың қаза табуы мен жарақаттануы ең өткір проблема екенін көрсетеді.

Осылай, республикада ағымдағы жылдың басынан өрт кезінде 12 бала қаза тапты, оның ішінде 9 бала мектепке дейінгі жаста, (2016ж. – 45, 2015ж. – 27), 15 бала жарақаттанды, оның ішінде 9 бала мектепке дейінгі жаста, (2016ж. – 74, 2015ж. – 105), улы газбен уланудан 9 бала қаза тапты, оның ішінде 3 бала мектепке дейінгі жаста, (2016ж. – 16, 2015ж. – 11), 80 бала жарақаттанды, оның ішінде 61 бала мектепке дейінгі жаста, (2016ж. – 550, 2015ж. – 345).

Бұл ретте, бүгінде бала өліміне жиі себеп болып табылатын өрт кезінде мектепке дейінгі мекемелердің тәрбиеленушілерін жүріс-тұрыс қағидаларына оқыту бойынша жүйелі әдіс жоқ.

Балалардың қаза табуы, олардың қауіптілік туралы түсінігінің толық қалыптаспағанын көрсетеді. Бұл, осы салада қарапайым танымдары жоқ ұрпақтың өсуіне алғышарттар туғызуы мүмкін.

Балалардың ойнауының салдарынан болатын өрттің алдын алу, сондай-ақ өрт кезінде балалардың саналы қауіпсіз жүріс-тұрысын қалыптастыру мақсатында Министрліктің Төтенше жағдайлар комитеті мектеп жасына дейінгі балаларды  өрт қауіпсіздігі шараларына үйрету жөнінде ұсынымдар әзірледі.

Ұсынымдар балалармен жұмыс жасаудың әртүрлі түрлері арқылы балаларға өрт қауіпсіздігі шараларын оқытудың негіздерін, білім беру процесін ұйымдастыру ерекшеліктерін, балаларға өрт қауіпсіздігі шараларын оқыту нысандары  мен әдістерін қамтиды.

Қазақстан Республикасы

Ішкі істер министрінің орынбасары                                                   Ю. Ильин